WSO2 වෙතින් නොමිලේ Linux Systems Administration සහ DevOps Engineering පුහුණු වැඩසටහනක්

0
110
WSO2 Linux - LankaTalks
තොරතුරු තාක්ෂණ ක්ෂේත්‍රයේ පුහුණු වෘත්තිකයන්ගේ හිඟය පියවීමේ අරමුණ මුල්කොට ගෙන, උසස් තත්ත්වයේ පරිගණක විද්‍යා පුහුණු සම්පත් භාවිතා කිරීමේ අවස්ථාව ලබාදෙමින්, පදනම් මට්ටමේ ඩිජිටල් හැකියාවන් නංවාලීමේ උත්සහයක්

ඩිජිටල් පරිවර්තන තාක්ෂණයේ ප්‍රමුඛයා වන WSO2 සමාගම  , මේ වනවිට මාස 6 ක කාලයක් සඳහා වන Linux Systems Administration සහ DevOps Engineering පුහුණු වැඩසටහනක් හඳුන්වා දී තිබේ. මෙම ව්‍යාපෘතිය ඔස්සේ, තාක්ෂණ අධ්‍යයනය සඳහා අවශ්‍ය සම්පත් භාවිතා කිරීමට ඇති අවස්ථා පුළුල් කරමින්, රැකියාවේ ඉදිරියට යාම සඳහා පවතින අවකාශය  වර්ධනය කරමින්, අනාගත තොරතුරු තාක්ෂණ අභියෝග ජයගැනීම සඳහා වැදගත් වන කුසලතා සහිත වෘත්තිකයන් නිර්මාණය කිරීමට WSO2 සමාගම  අපේක්ෂා කරයි. WSO2 හි ආයතනික ප්‍රජා සත්කාර වැඩසටහන් මාලාවේ එක් අදියරක් වන මෙය, එම සමාගමේ ඩිජිටල් මෙහෙයුම් කණ්ඩායමේ මූලිකත්වයෙන්  ක්‍රියාත්මක වන අතර, 100 දෙනෙකුට අධික පිරිසකට නොමිලයේ මෙම පාඨමාලා හැදෑරීමට අවස්ථාව ලැබෙනු ඇත.

WSO2 සමාගම  දැනටමත් දක්ෂ පද්ධති ඉංජිනේරුවන් (Systems Engineers) සහ DevOps ඉන්ජිනේරුවන් නිර්මාණය කිරීමට සමත් වී තිබේ. මහා පරිමාණයේ cloud  පරිගණක පද්ධති තුළ කටයුතු කිරීමේදී අවශ්‍ය වන නවීනතම තාක්ෂණය භාවිතා කිරීමේ හැකියාව මෙම DevOps ඉංජිනේරුවන් සතු ය. එමෙන්ම ආරක්ෂක විධිවිධාන සමග සිය පරිගණක පද්ධති  පැය 24 පුරා ක්‍රියාත්මක වන බව සහතික කරන පද්ධති ඉංජිනේරුවෝ, Linux පදනම් කරගත් WSO2 සමාගමේ  යටිතල ව්‍යුහය නිසියාකාරයෙන් ක්‍රියාත්මක වීමේ වගකීම දරති. මේ ආකාරයට තමන් සතුව පවතින දැනුම හා අත්දැකීම් ක්ෂේත්‍රයේ යහපත උදෙසා ලබාදීමට WSO2 සමාගම  උනන්දුවෙන් සිටී.

මෙම වැඩසටහන නව Linux Systems Administrator සහ DevOps Engineer තනතුරු වල කටයුතු කරන්නන්ට මෙන්ම උපාධි පාඨමාලා හදාරන ජ්‍යෙෂ්ඨ මට්ටමේ ශිෂ්‍ය ශිෂ්‍යාවන්ටද ඉතාමත් සුදුසු ය. මෙම වැඩසටහන මගින් ඔවුන්ට තම වෘත්තීය ගමන වඩාත් සාර්ථක ලෙස ආරම්භ කිරීම සඳහා අවශ්‍ය කුසලතා හා තාක්ෂණික දැනුම හිමිවනු ඇත. පුළුල් මට්ටමේ මගපෙන්වීමක් සමග ප්‍රායෝගික ක්‍රියාකාරකම් හා ව්‍යාපෘති මෙම පාඨමාලා වලට ඇතුළත් වී තිබේ. ඒවාට සහභාගී වන කාටත්, විවිධාකාරයේ තාක්ෂණයන් සම්බන්ධයෙන් සිය කුසලතා වර්ධනය කරගැනීමට අගනා අවස්ථාවක් හිමිවනු ඇත.

Training Program on Linux Systems Administration & DevOps Engineering - LankaTalks

“සමාගමක් ලෙස අප සෑම විටම උත්සාහ කරන්නේ අපගේ කාර්ය මණ්ඩලයේ කුසලතා වර්ධනය කිරීමටයි. කාලයත් සමග තමන් රැස්කරගත් දැනුම හා අත්දැකීම් සමගින් සමාජයට යහපතක් කළ හැකි පදනමක් ඔවුන් මේ වනවිට නිර්මාණය කරමින් ඉන්නවා. අපගේ ඉලක්කය වී තිබෙන්නේ තොරතුරු තාක්ෂණ ක්ෂේත්‍රයේ තිරසාර වර්ධනයක් ඇතිකරමින් වෘත්තිකයන්ට රැකියා අවස්ථා උදාකර දීමයි.” WSO2 සමාගමේ  නිර්මාතෘ සහ ප්‍රධාන විධායක නිලධාරී සංජීව වීරවර්ණ මහතා පැවසී ය.

මාර්ගගත (Online) ක්‍රමයට පවත්වනු ලබන මෙම පාඨමාලාව පැය 50 ක පමණ පන්ති කාලයකින් සමන්විත වේ. ඊට අමතරව තම දැනුම තවදුරටත් දියුණු කරගැනීමේ ක්‍රියාකාරකම් සඳහා සිසුන් තවත් පැය 200 ක පමණ කාලයක් වෙන්කළ යුතු ය. පාඨමාලාව සම්බන්ධ වියදම් ආවරණය කරගැනීම සඳහා සිසුන්ට මාසික දීමනාවක් ගෙවීමටද කටයුතු යොදා තිබේ.

මේ සම්බන්ධයෙන් උනන්දුවක් දක්වන පුද්ගලයන්, https://wso2.com/training/linux-systems-administration-and-devops-engineering,  සබැඳිය ඔස්සේ ලියාපදිංචි වීමේ ආකෘති පත්‍රය යොමු කළ යුතු අතර, තමන් මෙම පාඨමාලා සඳහා අයදුම් කරන හේතුව සහ, Linux systems administration සහ DevOps engineering සම්බන්ධයෙන් තමන් උනන්දුවක් දක්වන්නේ ඇයිද යන්න පිළිබඳව වචන 300 ක පමණ පැහැදිලි කිරීමක්ද ඒ සමග ඉදිරිපත් කළ යුතු ය. අදාළ විෂයන් සම්බන්ධයෙන් මීට පෙර ලබා ඇති අත්දැකීම්ද එම විස්තරයේ සඳහන් කළ යුතු වේ.

ඔබගේ සියලුම විමසීම් linuxtraining@wso2.com විද්‍යුත් ලිපිනය වෙත යොමුකරන්න.

LEAVE A REPLY

Please enter your comment!
Please enter your name here