එමිරේට්ස් විසින් සිය ගුවන් මගීන්ට පුළුල් බහු අවදානම් ගමන් ආවරණයක් හඳුන්වා දෙයි

0
34

එමිරේට්ස් ගුවන් මගීන්ට වඩාත් සුරක්ෂිත ලෙස තම ගුවන් ගමන් සැලසුම් කරගැනීමට අවස්ථාව ලබාදෙමින් එමිරේට්ස් විසින් ලබාදුන් කොවිඞ්-19 රක්ෂණාවරණය බහු අවදානම් ගමන් ආවරණයක් දක්වා පුළුල් කර තිබෙන අතර ගුවන් සේවා කර්මාන්තයේ මෙවැනි රක්ෂණාවරණයක් හඳුන්වා දී තිබෙන්නේ පළමු වතාවට වීම කැපී පෙනේ.

එමිරේට්ස් විසින් මෙම රක්ෂණාවරණය සිය ගුවන් මගීන්ට අමතර ගාස්තු අය කිරීමකින් තොරව ප‍්‍රදානය කරන අතර එය ලබාදෙන්නේ AIG ට‍්‍රැවල් මගිනි. ගුවන් සේවා සහ ගමන් රක්ෂණ කර්මාන්තය විසින් මේ ආකාරයේ රක්ෂණාවරණයක් ඉදිරිපත් කරන්නේ පළමු වතාවට බව සමාගම සඳහන් කරයි. සියලූම එමිරේට්ස් ගුවන් මගීන්ට ආතතියෙන් සහ කරදරයකින් තොරව සංචාරය කිරීම සඳහා අවශ්‍යවන සැබෑ පහසුකම් ඇතුළත් වන ආකාරයෙන් මෙම රක්ෂණාවරණය නිර්මාණය කර තිබේ.

මෙම නව බහු-අවදානම් ගමන් රක්ෂණය සහ කොවිඞ්-19 රක්ෂණාවරණය දෙසැම්බර් 01 වනදා සිට ප‍්‍රවේශපත් මිලදීගන්නා සියළුම එමිරේට්ස් ගුවන් මගීන්ට ඉබේම ලැබෙන අතර 176 යන අංක වලින් පටන් ගන්නා ප‍්‍රවේශපත‍්‍ර හිමි එමිරේට්ස් ගුවන් මගීන්ට මෙම ආවරණය පාර්ශවකාර ගුවන් සමාගම්වල ගුවන් සේවා භාවිතා කරන විටද වලංගු වනු ඇත.

මේ පිළිබඳව අදහස් දක්වමින් එමිරේට්ස් සමූහයේ සහ එමිරේට්ස් ගුවන් සේවයේ සභාපති හා ප‍්‍රධාන විධායක නිලධාරී ෂික් අහමඞ් බින් සයීඞ් අල් මක්ටුම් මහතා මෙසේ පැවසීය. ‘ජූලි මාසයේ සිට මගීන්ට ගෝලීය කොවිඞ්-19 රක්ෂණාවරණයක් ලබාදුන් පළමු ගුවන් සමාගම වන්නේ එමිරේට්ස් සමාගමයි. මේ පිළිබඳව ගුවන් මගීන්ගෙන් අතිශය දිරිමත් කරන සුළු ප‍්‍රතිචාර අපිට ලැබුණා. මේ අනුව, මෙයටත් වඩා ප‍්‍රතිලාභයක් අපගේ ගුවන් මගීන්ට ලබාදීමට අපගේ අවධානය යොමුවුණා. මෙහි ප‍්‍රතිඵලයක් ලෙස අපි ගුවන් සේවා කර්මාන්තයේ පළමු වරට නව බහු අවදානම් ගමන් රක්ෂණයක් සහ කොවිඞ්-19 රක්ෂණාවරණයක් අපගේ ගුවන් මගීන්ට ලබාදෙනවා.’

‘ලෝකය පුරා ජනතාව සංචාරය කිරීමේ දැඩි වුවමනාවකින් පෙළෙන බව අපිට පෙනෙනවා. විශේෂයෙන්ම ශීත නිවාඩු කාලය පැමිණීමත් සමග උණුසුම් දේශගුණික ප‍්‍රදේශ වලට සහ ඩුබායි වැනි පවුලේ සංචාරක ගමනාන්ත වලට ගමන් කිරීමට ඔවුන් උනන්දුවක් දක්වනවා. මෙම නව බහු අවදානම් ගමන් රක්ෂණය සහ කොවිඞ්-19 රක්ෂණාවරණය හඳුන්වාදීමෙන් පසුව මෙම ශීත සෘතුවේ සහ 2021 වසරෙන් ඔබ්බට ඉතාමත් විශ්වාසයෙන් සංචාරය කිරීමේ අවස්ථාව අපි විසින් අපගේ ගුවන් මගීන්ට ලබාදී තිබෙනවා.’

මෙහිදී, එමිරේට්ස් ගුවන් මගීන්  ඕනෑම මගී පන්තියක් යටතේ  ඕනෑම ගමනාන්තයකට ගමන් කිරීමේදී මෙම රක්ෂණාවරණ මගින් ආවරණය වනු ඇත. මේ අනුව, මේ යටතේ රටින් පිට හදිසි වෛද්‍ය වියදම් සහ හදිසි වෛද්‍ය ප‍්‍රතිකාර මෙන්ම ආපසු ගෙන්වා ගැනීම සඳහා ඇමරිකානු ඩොලර් 500,000 ක් දක්වා ආවරණයක් හිමිවන අතර එය වලංගු වන්නේ කොවිඞ්-19 (ගමන තුළදී වැළඳීම) සහ ගමන් කරන විට ඇතිවන අනිකුත් හදිසි වෛද්‍ය අවශ්‍යතා සඳහායි.

මෙම රක්ෂණාවරණ ලබාගැනීම සඳහා පාරිභෝගිකයින් ලියාපදිංචිවීම හෝ අයදුම් පත් පිරවීමට අවශ්‍ය නොවන අතර ඒ පිළිබඳව වැඩි තොරතුරු ලබාගැනීම සඳහා www.emirates.com/multi-risk-travel-insurance වෙත පිවිසෙන්න.

LEAVE A REPLY

Please enter your comment!
Please enter your name here